Den underlege lille nazisekta frå Sverige, Svenska Motståndsrörelsen, freistar å etablere seg i Noreg om dagen, og fekk mykje merksemd for det dei omtalar som ein vellukka aksjon i Bartebyen. Med vellukka aksjon meiner denne gjengen ei forsamling på rundt 30 stykk som klarar å hamne i klammeri med lokalbefolking og purk, og 25 av dei vert arrestert. Og så visar det seg sjølvsagt at 23 av desse 25 er svenskar. Det er så ille i dette landet at nasjonalistar no må importere utlendingar for å protestere mot innvandringa til landet. Jommen sa eg smør. På si side meiner dei at dette fokuset på antalet svensker i demonstrasjonen er ein del av ein anti-svensk mediekampanje. Ja, det er vel dei enorme mengdene med jødar i dette landet som står bak det då. I vårt naboland har gruppa bygd seg opp til å verte eit velsmurt aktivistnettverk, eller klin kokos sekt om du vil. Medlemmane vert avkrevd store mengder tiende for å dekke leiaren sitt behov for cheeseburger, medan dei er forventa til å reise land og strand rundt i sitt arbeid for frigjeringskampen. Dette er hyperaktivisme. I Noreg, der slikt er mindre populært, slit dei litt meir, men dei prøver i det minste å ha ein aktiv fasade på nettsida deira. Her kan vi til stadig lese om kamprapportar. Noko som høyres langt meir spennande ut enn det er; det er altså små notisar om at dei har hengt opp eit flygeblad eller stappa noko rask ned i ei uskuldig postkasse utan å verte oppdaga. Veldig bra gutar, foreldra dykkar er sikkert stolte av dykk no. Alle fem av dykk. Nettsidene er forøvreg godt designa i forhold til det tøvet som slike grupper ofte klarar å kline utover nettet her på desse trakter, og inneheld kryptisk informasjon om medlemsgradar og om kor heftig tøft og kult det er å vere aktivist - dersom ein er så heldig å klare dei fysiske opptakskrava. Ja, eg veddar på at det står ein kø og ventar på å verte tatt opp. Mhm.
Deira førar her til lands er ein Haakon Forwald, kjend frå det nasjonalsosialistiske black metal-bandet Disiplin. Eit skikkeleg sjarmtroll av ein mann, som de over her kan sjå tale til sine imaginære tilhengjarar. Jo meir ein grev i tankane til denne karen, jo betre vert det. Og eg har, grunna influensa, ikkje gått særleg i djupnad. Men det eg har sett har fått vommen til å riste av vellyst. Her snakkar vi om ein mann ikkje berre med langt fartstid som nasse, men som naziokkultist knytt til mellom anna ein av desse avstikkarane til Temple of Set, nemleg den så utruleg modne Misanthropic Luciferian Order. Javisst, her snakkar vi skikkeleg tøffe gutar som ikkje berre er luciferianske eller misantropiske, men beggje delar. Åååååh, så dei hatar verda. Skikkeleg òg. Og så er dei (Ariske) overmenneske. Liksom. Atte. Sånn at dei er betre enn alle desse andre menneska. Som liksom berre er patetiske. Skjønner? Fordi dei skjønner ikkje. Altså. Ja? Eg skjelv her eg sitt, mo i knerna. Dette er tøffe saker. Som ein person oppsummerar gruppa: "
Their goals are to create a synthesis between the dark traditions of all the ancient aeons and thus to create the occult keys that shall open the gates to the forthcoming endless dark aeon."
Akkurat, ja. Eg finn denne Haakon simpelthen uimotståeleg. Kva er vel betre enn ein politikar som er ærleg om kva han planlegg? Han vil få ned få bukt med avgiftsveldet, lempe ut innvandrarar, drepe jødar og muslimar... og ja, opne helvetes porter og opne opp for forhandlingar med Lucifer og Cthulhu. Der har vi koalisjonsregjering med futt i folkens - dei lover oss tusen år med mørke!
Det er nokre andre boller enn dette nazisludderet dei vanlegvis preiker om når dei forkynner sine germanske paradis. Helvete på jord! Det veit vi at nazistar er flinke til, så dette er reine ord for penga simpelthen. Gje Haakon ei munkekutte og ein fakkel. Og kanskje ein kul bok å ha under armen. Så vert den norske motstandrørsla ei sekt med ballar. Og røykelse. Røykelse er altfor lite på dagsordenen blant naziokkultistar.
Innlegg
